റാന്നി: കുഴഞ്ഞ് റോഡരികില്‍ വീണുകിടന്നയാൾ സൂര്യാതപമേറ്റ് മരിച്ചു. അങ്ങാടി മേനാംതോട്ടം സ്വദേശി മേപ്പുറത്ത് സണ്ണി തോമസാണ് (64) മരിച്ചത്. റാന്നി ഇട്ടിയപ്പാറ കോളജ് റോഡിലെ ബാര്‍ ഹോട്ടലിനുസമീപമാണ് സംഭവം. ചൊവ്വാഴ്ച രാവിലെ ഒമ്പതോടെയാണ് ഇയാള്‍ റോഡരികില്‍ വീഴുന്നത്. മദ്യപിച്ചശേഷം വീണുകിടക്കുന്നതിനാല്‍ ആരും തിരിഞ്ഞു നോക്കിയില്ല. സമയം അധികരിച്ചിട്ടും എഴുന്നേറ്റ് പോകാതായതോടെ സമീപത്തെ വ്യാപാരികള്‍ അഗ്നിരക്ഷാസേനയെ വിവരം അറിയിച്ചു. ഒരു മണിക്കൂറോളം കഴിഞ്ഞ് റാന്നി പൊലീസ് സ്ഥലത്തെത്തിയെങ്കിലും സണ്ണി മരിച്ചിരുന്നു. ചൂട് കനത്തതോടെ ശരീരത്തിലെ ജലാംശം നഷ്ടപ്പെട്ട് മരിച്ചതാകാമെന്നാണ് നിഗമനം.
