കൊച്ചി: എറണാകുളം നോർത്തിലെ ലോഡ്ജ് മുറിയിൽ യുവാവിനെ തൂങ്ങിമരിച്ചനിലയിൽ കണ്ടെത്തി. പത്തനംതിട്ട അത്തിക്കാവ് ഗോകുൽഭവനിൽ ഗോകുൽ ബിജുവിനെയാണ് (22) മരിച്ചനിലയിൽ കണ്ടെത്തിയത്. വെള്ളിയാഴ്ച വൈകീട്ട് മൂന്നോടെയാണ് സംഭവം. പ്രണയനൈരാശ്യമാണ് ആത്മഹത്യയിലേക്ക് നയിച്ചതെന്നാണ് പൊലീസിന്റെ പ്രാഥമിക നിഗമനം. ബ്യൂട്ടിഷ്യനായ ഗോകുൽ മൂന്നുമാസം മുമ്പാണ് എറണാകുളത്ത് എത്തിയത്. നോർത്തിലെ എസ്.ബി.ഐക്ക് മുകളിലെ ലോഡ്ജിൽ മാസവാടകക്ക് താമസിക്കുകയായിരുന്നു. വെള്ളിയാഴ്ച രാവിലെയും ഗോകുലിനെ കണ്ടതായി ലോഡ്ജ് ജീവനക്കാർ പറഞ്ഞു. പിന്നീട് വൈകീട്ട് വരെ കണാതിരുന്നപ്പോൾ ഹോട്ടൽ ജീവനക്കാരൻ സംശയംതോന്നി പൊലീസിനെ അറിയിക്കുകയായിരുന്നു. പൊലീസ് മുറിതുറന്ന് പരിശോധിച്ചപ്പോഴാണ് തൂങ്ങിയനിലയിൽ ഗോകുലിനെ കണ്ടത്. ഇൻക്വസ്റ്റ് നടപടി പൂർത്തിയാക്കി മൃതദേഹം ജനറൽ ആശുപത്രിയിലേക്ക് മാറ്റി. പോസ്റ്റ്മോർട്ടം നടപടി പൂർത്തിയാക്കിയശേഷം മൃതദേഹം ശനിയാഴ്ച ബന്ധുക്കൾക്ക് വിട്ടുനൽകും. എറണാകുളം നോർത്ത് പൊലീസ് കേസെടുത്ത് അന്വേഷണം ആരംഭിച്ചു.
