എരുമപ്പെട്ടി: ചിറ്റണ്ട ചെറുചക്കിച്ചോലയിലെ ചെക്ക് ഡാമിൽ കുളിക്കാനിറങ്ങിയ വിദ്യാർഥി മുങ്ങിമരിച്ചു. ചാവക്കാട് തിരുവത്ര പുതിയറ ജീലാനി നഗറിൽ മേപ്പുറത്ത് വീട്ടിൽ ഷംസുദ്ദീന്റെ മകൻ ഷഫാസ് (17) ആണ് മരിച്ചത്. എടക്കഴിയൂർ സീതി സാഹിബ് മെമ്മോറിയൽ സ്കൂളിലെ പ്ലസ് ടു വിദ്യാർഥിയാണ്. ഞായറാഴ്ച രാവിലെ ഒമ്പതരയോടെ രണ്ട് കൂട്ടുകാരുമൊത്ത് ചെറു ചക്കിച്ചോലയിൽ എത്തി കുളിക്കുന്നതിനിടെയാണ് സംഭവം. ഒപ്പമുണ്ടായിരുന്ന കൂട്ടുകാർ വിവരം അറിയിച്ചതിനെ തുടർന്ന് നാട്ടുകാർ എത്തിയാണ് ഷഫാസിനെ പുറത്തെടുത്തത്. എരുമപ്പെട്ടി ആക്ട്സ് പ്രവർത്തകർ മുളങ്കുന്നത്തുകാവ് മെഡിക്കൽ കോളജ് ആശുപത്രിയിൽ എത്തിച്ചെങ്കിലും മരിച്ചു. കഴിഞ്ഞ ജൂലൈ പത്തിന് പെരുന്നാൾ ദിനത്തിൽ ഡാമിൽ കുളിക്കാൻ ഇറങ്ങിയ വരവൂർ സ്വദേശിയായ യുവാവ് അപകടത്തിൽപെട്ടിരുന്നു.
