ആമ്പല്ലൂർ: ദേശീയപാത പുതുക്കാട് പിതാവിനോടൊപ്പം സ്കൂട്ടറിൽ പോവുകയായിരുന്ന വിദ്യാർഥിനി അപകടത്തിൽ മരിച്ചു. ആമ്പല്ലൂർ വടക്കുമുറി പുത്തൻപറമ്പിൽ സുനിലിന്റെയും സജിതയുടെയും മകൾ ശിവാനിയാണ് (13) മരിച്ചത്. പരിക്കേറ്റ സുനിൽ ചികിത്സയിലാണ്. വെള്ളിയാഴ്ച രാവിലെ പത്തരയോടെ പുതുക്കാട് ഗ്രൗണ്ടിന് സമീപമാണ് അപകടം. പരിക്കേറ്റ് റോഡിൽ കിടന്നിരുന്ന ഇരുവരെയും കൊടകരയിലെ സ്വകാര്യ ആശുപത്രിയിൽ എത്തിച്ചെങ്കിലും ശിവാനിയെ രക്ഷിക്കാനായില്ല. നന്തിക്കര ശ്രീരാമകൃഷ്ണ വിദ്യാനികേതൻ സ്കൂളിലെ എട്ടാം ക്ലാസ് വിദ്യാർഥിനിയാണ് ശിവാനി. സ്കൂളിലെ ക്രിസ്മസ് ആഘോഷത്തിൽ പങ്കെടുക്കാൻ പോവുകയായിരുന്നു. ലോറി സ്കൂട്ടറിൽ ഇടിച്ചതിനെ തുടർന്നാണ് അപകടമെന്ന് പറയുന്നു. അതേസമയം, ലോറി സ്കൂട്ടറിൽ ഇടിച്ചിട്ടില്ലെന്നും സ്കൂട്ടർ നിയന്ത്രണം വിട്ട് മറിയുകയായിരുന്നെന്നുമാണ് ലോറി ഡ്രൈവർ നൽകിയ മൊഴിയെന്നും ഇക്കാര്യത്തിൽ സ്ഥിരീകരണം ആവശ്യമാണെന്നും പുതുക്കാട് പൊലീസ് പറഞ്ഞു. ലോറി പൊലീസ് കസ്റ്റഡിയിലെടുത്തു.
