പേരൂർക്കട: മുട്ടട വാർഡ് കൗൺസിലറും സി.പി.എം കേശവദാസപുരം ലോക്കൽ കമ്മിറ്റി അംഗവുമായ മുട്ടട കീഴെ കണ്ണേറ്റിൽ വീട്ടിൽ ടി.പി. റിനോയ് (47) നിര്യാതനായി. ബുധനാഴ്ച രാവിലെ 10ഓടെ മെഡിക്കൽ കോളജ് ആശുപത്രിയിലായിരുന്നു അന്ത്യം. വൃക്ക സംബന്ധമായ അസുഖത്തെ തുടർന്ന് മൂന്നു ദിവസം മുമ്പാണ് ആശുപത്രിയിൽ പ്രവേശിപ്പിച്ചത്. ഡി.വൈ.എഫ്.ഐ കേശവദാസപുരം മുൻ ലോക്കൽ സെക്രട്ടറി, പേരൂർക്കട ഏരിയ മുൻ ജോയൻറ് സെക്രട്ടറി, പി.കെ.എസ് മേഖലാ സെക്രട്ടറി എന്നീ നിലകളിൽ പ്രവർത്തിച്ചു. ഭാര്യ: സിമി. മക്കൾ: അഭിനവ് വാസുദേവ്, അഭിനന്ദ് വാസുദേവ്, അഭിരാം വാസുദേവ്. പിതാവ്: ബി. തുളസീധരൻ, മാതാവ്: പത്മകുമാരി
സി.പി.എം ജില്ല സെക്രട്ടറി വി. ജോയി എം.എൽ.എ, എം. വിജയകുമാർ, കടകംപള്ളി സുരേന്ദ്രൻ എം.എൽ.എ, കെ.സി. വിക്രമൻ, സി. വേലായുധൻ നായർ എന്നിവർ ചേർന്ന് പാർട്ടി പതാക പുതപ്പിച്ചു. മൃതദേഹം വ്യാഴാഴ്ച്ച ഉച്ചക്ക് രണ്ടിന് നഗരസഭയിൽ പൊതുദർശനത്തിനുവെച്ച ശേഷം നാലിന് തൈക്കാട് ശാന്തികവാത്തിൽ സംസ്കരിക്കും. മന്ത്രി വി. ശിവൻകുട്ടി, ആനാവൂർ നാഗപ്പൻ, മേയർ ആര്യാ രാജേന്ദ്രൻ, വി.കെ. പ്രശാന്ത് എം.എൽ.എ, വി.പി. ഉണ്ണിക്കൃഷ്ണൻ, ഡെപ്യൂട്ടി മേയർ പി.കെ. രാജു, വി. അനൂപ്, വി.വി. രാജേഷ്, ജനപ്രതിനിധികൾ തുടങ്ങിയവർ അന്ത്യോപചാരം അർപ്പിച്ചു.
