മാർബിൾ ഇറക്കുന്നതിനിടെ ദേഹത്ത് വീണ് ഇതര സംസ്ഥാന തൊഴിലാളിക്ക് ദാരുണാന്ത്യം
താനൂർ: താനൂർ പട്ടരുപറമ്പ് ആണിക്കമ്പനിക്കടുത്ത് മാർബിൾ ലോഡ് ഇറക്കുന്നതിനിടെ ദേഹത്തുവീണ് ഇതര സംസ്ഥാന തൊഴിലാളിക്ക് ദാരുണാന്ത്യം. കണ്ടെയ്നറിൽ നിന്ന് ലോഡ് മറ്റൊരു വണ്ടിയിലേക്ക് മാറ്റുന്നതിനിടെ മാർബിളിന്റെ അട്ടി ദേഹത്ത് വീണാണ് അപകടമുണ്ടായത്. കൊൽക്കത്ത സ്വദേശി ബാപ്പിയാണ് (42) മരിച്ചത്. കൂടെയുണ്ടായിരുന്ന മേഘനാഥൻ, മുകുൽ ദാസ് എന്നിവർക്ക് പരിക്കേറ്റു. ഗുരുതര പരിക്കേറ്റ മുകുൽദാസിനെ താനൂർ മൂലക്കലിലെ സ്വകാര്യ ആശുപത്രിയിൽ പ്രാഥമിക ശുശ്രൂഷ നൽകിയ ശേഷം കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി. വ്യാഴാഴ്ച ഉച്ചക്ക് 12 മണിയോടെയായിരുന്നു സംഭവം. താനൂർ അഗ്നിരക്ഷ സേന, പൊലീസ്, ടി.ഡി.ആർ.എഫ് വളന്റിയർമാർ എന്നിവരും നാട്ടുകാരും ചേർന്നാണ് രക്ഷപ്രവർത്തനം നടത്തിയത്.
