മുതലമട: വഴിയരികിൽ അവശനായി കിടന്ന വയോധികൻ ചികിത്സക്കിടെ മരിച്ചു. മുതലമട പാപ്പാൻ ചള്ള വടക്കേചള്ളയിൽ കേശവനാണ് (70) മരിച്ചത്. ചെറുപ്രായത്തിൽ വീടുവിട്ടിറങ്ങിയ കേശവൻ ചെറുജോലികൾ ചെയ്ത് കഴിയുകയായിരുന്നു. ഒക്ടോബർ 20 മുതൽ അവശനായി റോഡരികിൽ കിടക്കുകയായിരുന്നു. ഭക്ഷണമില്ലാതെ അവശനായിക്കിടന്ന കേശവനെ കഴിഞ്ഞ 25നാണ് ആംബുലൻസ് ഡ്രൈവർ ടി. ഗോപി ഓട്ടോ ഡ്രൈവർമാരുടെ സഹകരണത്തോടെ ജില്ല ആശുപത്രിയിലെത്തിച്ചത്. കൂട്ടിരുപ്പുകാർ ഇല്ലെന്ന കാരണത്താൽ ആശുപത്രി അധികൃതർ വാർഡിൽനിന്ന് പുറത്താക്കിയതായി നാട്ടുകാർ ആരോപിച്ചിരുന്നു. തുടർന്ന് പൊതു പ്രവർത്തകനായ റഹീം ഒലവക്കോട് ഇടപെട്ട് കലക്ടർ, ഡി.എം.ഒ എന്നിവരെ ബന്ധപ്പട്ട് വീണ്ടും ആശുപത്രിയിൽ പ്രവേശിപ്പിച്ചു. അവിവാഹിതനാണ്. മൃതദേഹം ഇന്ന് ബന്ധുക്കൾക്ക് വിട്ടുനൽകും.
