കൊയിലാണ്ടി: സി.പി.ഐ നേതാവ് മലയമ്മൽ എം. നാരായണൻ മാസ്റ്റർ (70) നിര്യാതനായി. സി.പി.ഐ സംസ്ഥാന കൗൺസിൽ അംഗമായിരുന്നു നാരായണൻ മാസ്റ്റർ. നാളികേര വികസന കോർപറേഷൻ ചെയർമാൻ, പന്തലായനി ബ്ലോക്ക് പഞ്ചായത്ത് പ്രസിഡന്റ്, കോഴിക്കോട് ജില്ല സഹകരണ ബാങ്ക് ഡയറക്ടർ, മൂടാടി സർവിസ് സഹകരണ ബാങ്ക് ഡയറക്ടർ, കോഴിക്കോട് മെഡിക്കൽ കോളജ് വികസന സമിതി അംഗം തുടങ്ങിയ പദവികൾ വഹിച്ചിട്ടുണ്ട്. മൂടാടി വീമംഗലം യു.പി സ്കൂൾ മുൻ അധ്യാപകനായിരുന്ന ഇദ്ദേഹം സി.പി.ഐ ജില്ല അസിസ്റ്റന്റ് സെക്രട്ടറി, ബി.കെ.എം.യു ദേശീയ കൗൺസിൽ അംഗം. എ.ഐ.ടി.യു.സി സംസ്ഥാന നിർവാഹക സമിതി അംഗം. എ.ഐ.വൈ.എഫ് ജില്ല സെക്രട്ടറി, സി.പി.ഐ കൊയിലാണ്ടി മണ്ഡലം സെക്രട്ടറി എന്നീ നിലകളിൽ പ്രവർത്തിച്ചു.
പിതാവ്: പരേതനായ ചാത്തു. മാതാവ്: പരേതയായ കല്യാണി. ഭാര്യ: കല്യാണി ടീച്ചർ (മുൻ അധ്യാപിക, മഹിളാ സംഘം ജില്ല കമ്മിറ്റി). മക്കൾ: അശ്വിൻ രാജ് നാരായണൻ (സോഫ്റ്റ് വേർ എൻജിനീയർ യു.എസ്.എ), അരുൺ രാജ് നാരായണൻ (സോഫ്റ്റ് വെയർ എൻജിനീയർ യു.കെ). മരുമക്കൾ: ടൈലർ (യു.എസ്.എ), ഡോ. ഹരിത (പേരാമ്പ്ര).
സഹോദരങ്ങൾ: ജാനു (തിക്കോടി), കമല (മുചുകുന്ന്), ലീല (പാലോളി), നാണി (കീഴൂർ), ഗോപാലൻ, അശോകൻ, കുഞ്ഞികൃഷ്ണൻ, പരേതനായ കുഞ്ഞിക്കണാരൻ. സംസ്കാരം രാവിലെ 10ന് നന്തിയിലെ വീട്ടുവളപ്പിൽ.
