കോട്ടക്കൽ (മലപ്പുറം): സർവിസ് നടത്തുന്നതിനിടെ നെഞ്ചുവേദന അനുഭവപ്പെട്ടതോടെ യാത്രക്കാരെ സുരക്ഷിതരാക്കിയ ബസ് ഡ്രൈവർ ഒടുവിൽ മരണത്തിന് കീഴടങ്ങി. പറപ്പൂർ കുരിക്കൾ ബസാർ തൊട്ടിയിൽ മുഹമ്മദിന്റെ മകൻ അബ്ദുൽ ഖാദറാണ് (45) മരിച്ചത്.
വ്യാഴാഴ്ച വൈകുന്നേരം കോട്ടക്കലിനു സമീപം പാറക്കോരിയിലാണ് സംഭവം.
മഞ്ചേരി-തിരൂർ റൂട്ടിലോടുന്ന ടി.പി ബ്രദേഴ്സ് ബസിലെ ഡ്രൈവറാണ്. കണ്ടക്ടർ പ്രജിനോട് തല കറങ്ങുന്നെന്ന് പറഞ്ഞതിനു പിന്നാലെ ഹാൻഡ് ബ്രേക്ക് വലിച്ച് ബസ് നിർത്തിയ അബ്ദുൽ ഖാദർ സ്റ്റിയറിങ്ങിലേക്കു കുഴഞ്ഞുവീഴുകയായിരുന്നു.
ഇതുവഴിയെത്തിയ അഗ്നിരക്ഷാസേന വാഹനത്തിലാണ് ഇദ്ദേഹത്തെ ചങ്കുവെട്ടിയിലെ സ്വകാര്യ ആശുപത്രിയിൽ എത്തിച്ചത്.
ചികിത്സക്കിടെ വെള്ളിയാഴ്ച ഉച്ചക്ക് രണ്ടരയോടെയായിരുന്നു മരണം. നേരത്തേ ഡ്രൈവറായിരുന്ന അബ്ദുൽ ഖാദർ പ്രവാസജീവിതം മതിയാക്കി ഒരു വർഷം മുമ്പാണ് വീണ്ടും പഴയ തൊഴിലിലേക്ക് തിരിച്ചെത്തിയത്.
ഭാര്യ: സാബിറ. മക്കൾ: ഷബീബ, അർഷദ്, ഷിയാസ്. മരുമകൻ: ഇഷാമുൽഹഖ്.
