കൊല്ലങ്കോട്: വെള്ളരിമേട് വെള്ളച്ചാട്ടത്തിൽ വീണ് യുവാവ് മരിച്ചു. കൊല്ലങ്കോട് കുതിരോട്ടുകുളമ്പ് ചന്ദ്രന്റെ മകൻ സജീഷാണ് (25) മരിച്ചത്. സുഹൃത്തുക്കളോടൊപ്പം വെള്ളച്ചാട്ടം കാണാനായി ശനിയാഴ്ച ഉച്ചക്ക് പുറപ്പെട്ടതായിരുന്നു. അഞ്ചുപേർ അടങ്ങുന്ന സംഘത്തിലെ സജീഷ് ഒന്നാം വെള്ളച്ചാട്ടത്തിന് മുകളിലെത്തവെയാണ് കാൽ വഴുതി വീണതെന്ന് പൊലീസ് പറഞ്ഞു.
കൈകാലുകൾക്കും തലക്കും പരിക്കേറ്റ സജീഷിനെ കൊല്ലങ്കോട് അഗ്നിരക്ഷാസേന നാട്ടുകാരുടെ സഹായത്തോടെ വെള്ളച്ചാട്ടത്തിൽനിന്ന് പുറത്തെടുത്ത് നെന്മാറയിലെ സ്വകാര്യ ആശുപത്രിയിലേക്ക് കൊണ്ടുപോയെങ്കിലും ചികിത്സക്കിടെ മരിക്കുകയായിരുന്നു. മേളം കലാകാരനാണ് സജീഷ്. മാതാവ്: മീനാക്ഷി. ഭാര്യ: ശാലിനി. മക്കൾ: ആദിഷ്, അവിനിഷ്. സഹോദരങ്ങൾ: അജീഷ്, സുജീഷ്. മൃതദേഹം പാലക്കാട് ജില്ല ആശുപത്രി മോർച്ചറിയിൽ.
