ആമ്പല്ലൂർ (തൃശൂർ): ചിമ്മിനി ഡാമിൽ വൈദ്യുതി കമ്പിയിൽ വീണ മരം മുറിച്ചു നീക്കുന്നതിനിടെ മരത്തടി തലയിലിടിച്ച് തൊഴിലാളി മരിച്ചു. എച്ചിപ്പാറ ചക്കുങ്ങൽ വീട്ടിൽ അലവിയുടെ മകൻ അബ്ദുൽ ഖാദറാണ് (49) മരിച്ചത്. തിങ്കളാഴ്ച രാവിലെ 11.30 ഓടെയായിരുന്നു അപകടം.
മരം വീണ് കമ്പികൾ താഴ്ന്നതോടെ മേശയിൽ കയറിനിന്ന് മുറിച്ചുമാറ്റിയ ശേഷം ഇറങ്ങുന്നതിനിടെ കമ്പിയിൽ കുടുങ്ങിനിന്ന തടി ഖാദറിന്റെ തലയിൽ വന്നിടിക്കുകയായിരുന്നു. ഉടൻ സ്ഥലത്തുണ്ടായിരുന്ന വനം വകുപ്പിന്റെ ജീപ്പിൽ വേലൂപ്പാടത്തെ ആശുപത്രിയിലും പിന്നീട് തൃശൂരിലെ ആശുപത്രിയിലും എത്തിച്ചെങ്കിലും രക്ഷിക്കാനായില്ല.
രണ്ടുദിവസം മുമ്പുണ്ടായ ശക്തമായ കാറ്റിലാണ് മരം കടപുഴകി വൈദ്യുതി കമ്പിയിൽവീണത്. ഡാമിലേക്കുള്ള വിനോദ സഞ്ചാരികളുടെ വാഹനങ്ങൾ പാർക്ക് ചെയ്യുന്ന ഭാഗത്തേക്കുള്ള വഴിയിലാണ് മരം വീണത്. രണ്ട് ദിവസമായി ഡാമിലേക്കുള്ള വൈദ്യുതിബന്ധവും നിലച്ചിരിക്കുകയായിരുന്നു.
