കാഞ്ഞങ്ങാട്: ഹോസ്ദുർഗ് താലൂക്ക് ലൈബ്രറി കൗൺസിൽ എക്സി കമ്മിറ്റി മെംബറും കാഞ്ഞങ്ങാട്ടെ പൊതുപ്രവർത്തന രംഗത്തെ നിറസാന്നിധ്യവുമായ കുശാൽനഗറിലെ എച്ച്.കെ. ദാമോദരൻ (72) നിര്യാതനായി. ദേശാഭിമാനി ബാലസംഘത്തിലൂടെ പൊതുരംഗത്തേക്ക് കടന്നുവന്നു. ഹോസ്ദുർഗ് താലൂക്ക് പ്രസിഡന്‍റ്, ഉത്തരമേഖല കമ്മിറ്റി അംഗം, എസ്.എഫ്.ഐ കാഞ്ഞങ്ങാട് ഏരിയ കൺവീനർ, കുശാൽനഗർ ഇ.കെ. നായനാർ സ്മാരക ഗ്രന്ഥാലയം സ്ഥാപക സെക്രട്ടറി, കാഞ്ഞങ്ങാട് പഞ്ചായത്ത് മെംബർ എന്നീനിലകളിൽ പ്രവർത്തിച്ചിരുന്നു. ഉടിഞ്ചിൽ എന്ന നോവൽ ഒരാഴ്ചമുമ്പ് പ്രകാശനം ചെയ്തിരുന്നു. വീട് കയറിയിറങ്ങിയുള്ള പുസ്തകവിതരണം നടത്തി ശ്രദ്ധേയനായിരുന്നു. ജില്ല സഹകരണ ബാങ്കിൽ ബിൽ കലക്ടറായിരുന്നു. ഭാര്യ: മീനാക്ഷി (വെസ്റ്റ് ഹിൽ). മക്കൾ: ദിവ്യ, ദീഷ്മ, ദൃശ്യ. സഹോദരങ്ങൾ: കെ. ഗോവിന്ദൻ, എച്ച്. ചാത്തു, കെ. രവീന്ദ്രൻ, എച്ച്. നാരായണൻ, പരേതനായ കെ. ബാലൻ. തിങ്കളാഴ്ച രാവിലെ 10 മുതൽ 12വരെ കാഞ്ഞങ്ങാട് ടൗൺ ഹാളിലും തുടർന്ന് വീട്ടിലും പൊതുദർശനത്തിന് വെക്കുന്ന മൃതദേഹം വൈകീട്ട് നാലിന് കാഞ്ഞങ്ങാട് പുതിയകോട്ട മുനിസിപ്പൽ ശ്മശാനത്തിൽ സംസ്കരിക്കും.
