മാരാരിക്കുളം: സി.പി.എം വളവനാട് ലോക്കൽ സെക്രട്ടറി കുഴഞ്ഞുവീണ് മരിച്ചു. ദേവസ്വം വെളി ഡി.എം. ബാബുവാണ് (55) മരിച്ചത്. ശനിയാഴ്ച രാവിലെ വീട്ടിൽ ചേർന്ന തെരഞ്ഞെടുപ്പ് യോഗത്തിനുശേഷം സഹപ്രവർത്തകരുമായി സംസാരിക്കുന്നതിനിടെയാണ് കുഴഞ്ഞുവീണത്. ഉടൻ തുമ്പോളിയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. എസ്.എഫ്.ഐയിലൂടെ പൊതുരംഗത്തേക്ക് വന്ന ബാബു ഡി.വൈ.എഫ്.ഐയുടെ കലവൂർ മേഖല ഭാരവാഹിയായും 13 വർഷം വളവനാട് ലോക്കൽ സെക്രട്ടറിയായും പ്രവർത്തിച്ചു. കലവൂർ സഹകരണബാങ്ക് ഭരണസമിതി അംഗമായിരുന്നു. ബെന്നി സ്മാരക പാലിയേറ്റിവ് സൊസൈറ്റി രക്ഷാധികാരി, സി.ഐ.ടി.യു ഏരിയ കമ്മിറ്റി അംഗം, വ്യാപാരി വ്യവസായി സമിതി ഏരിയ കമ്മിറ്റി അംഗം, കൺസ്ട്രക്ഷൻ വർക്കേഴ്സ് യൂനിയൻ മേഖല സെക്രട്ടറി, വളവനാട് സംയോജിത കയർ വ്യവസായ സഹകരണസംഘം പ്രസിഡൻറ് എന്നീ നിലകളിൽ പ്രവർത്തിച്ചിരുന്നു. ഭാര്യ: സിന്ധു (ക്ലർക്ക്, കേരള ബാങ്ക്, തുമ്പോളി ശാഖ). മക്കൾ: ആദർശ് (കലവൂർ സർവിസ് സഹകരണ ബാങ്ക്), ആദിത്യ (ബിരുദ വിദ്യാർഥിനി, എം.ജി കോളജ്, തിരുവനന്തപുരം).
