നെയ്യാറ്റിന്‍കര: മുന്‍ എം.എൽ.എ അഡ്വ. എസ്.ആര്‍. തങ്കരാജ് (84)നിര്യാതനായി. തിങ്കളാഴ്ച വൈകീട്ട് നെയ്യാറ്റിന്‍കരയിലെ സ്വകാര്യാശുപത്രിയിലായിരുന്നു അന്ത്യം. മൃതദേഹം ചൊവ്വാഴ്ച പകല്‍ മൂന്നു മണിയോടെ ആലുംമൂടിലെ സുഗതഭവനില്‍ പൊതുദര്‍ശനത്തിന് വെക്കും. തുടര്‍ന്നാകും കാഞ്ഞിരംകുളത്തേക്ക് കൊണ്ടുപോകുക. സംസ്കാരം ചൊവ്വാഴ്ച പകല്‍ നാലു മണിയോടെ കാഞ്ഞിരംകുളത്ത് കുടുംബ വീട്ടുവളപ്പില്‍. നെയ്യാറ്റിന്‍കരയെ പ്രതിനിധീകരിച്ച് 1982 മുതല്‍ തുടരെ രണ്ടു പ്രാവശ്യം എം.എൽ.എയായിരുന്നു. നെയ്യാറ്റിന്‍കര ബാര്‍ അസോസിയേഷന്‍ പ്രസിഡൻറ്, നെയ്യാറ്റിന്‍കര താലൂക്ക് അര്‍ബന്‍ ബാങ്ക് പ്രസിഡൻറ്, നെയ്യാറ്റിന്‍കര താലൂക്ക് രൂപവത്കരണ സമിതി പ്രസിഡൻറ്, പി. വിശ്വംഭരന്‍ ഫൗണ്ടേഷന്‍ പ്രസിഡൻറ്, ജനതാദള്‍ ഫോറം പ്രസിഡൻറ്, ജനതാദള്‍ സംസ്ഥാന ജനറല്‍ ജനറല്‍ സെക്രട്ടറി എന്നീ നിലകളില്‍ പൊതുരംഗത്ത് നിറസാന്നിധ്യമായിരുന്നു. ഭാര്യ പരേതയായ സുഗത. മക്കള്‍: ഹൈകോടതി അഡ്വ. ആര്‍.ടി. പ്രദീപ്, ടി.എസ്. സിന്ധു. മരുമക്കള്‍: എം. അജിത്കുമാര്‍ (കുവൈത്ത്), വിഥു കെ. വിക്ടര്‍.
