കൊല്ലങ്കോട്: സ്വത്തുതർക്കത്തെ തുടർന്ന് കൊല്ലങ്കോട്ടെ സ്വകാര്യ റിസോർട്ട് ഉടമയെ വെട്ടിെക്കാലപ്പെടുത്തി. കൊല്ലങ്കോട് പണിക്കത്ത് വീട്ടിൽ ടി.എൻ. രാജേന്ദ്രനാണ് (54) മരിച്ചത്. അയിലൂർ തിരുവഴിയാട് മണികണ്ഠനെ (53) പൊലീസ് കസ്റ്റഡിയിലെടുത്തു. മറ്റൊരു പ്രതി ബാബു കടമ്പടി പൊലീസ് നിരീക്ഷണത്തിലാണ്. മൂന്നാം പ്രതി കുമാരനെ കണ്ടെത്താൻ തിരച്ചിൽ ഊർജിതമാക്കി.നെന്മേനി മണികുണ്ഠംകളത്തിന് സമീപം മൂന്നംഗ സംഘമാണ് വ്യാഴാഴ്ച ഉച്ചകഴിഞ്ഞ് മൂന്നോടെ രാജേന്ദ്രനെ കൊലപ്പെടുത്തിയത്. കുടുംബ സ്വത്ത് സംബന്ധിച്ച് സഹോദരങ്ങൾ തമ്മിൽ തർക്കമുണ്ടായിരുന്നുവെന്ന് പൊലീസ് പറഞ്ഞു. നെന്മേനി മണികുണ്ഠം എന്ന സ്ഥലത്തുള്ള നാലര ഏക്കർ കൃഷിസ്ഥലവും തർക്കത്തിലായിരുന്നു. വ്യാഴാഴ്ച ഉച്ചക്ക് രാജേന്ദ്രൻ നെന്മേനിയിലെ ഫാം ഹൗസിലേക്ക് പോകുന്നതിനിടെ, വിതച്ച പാടത്ത് വാഹനം ഇറക്കിയതാണ് തർക്കങ്ങൾക്ക് വഴിവെച്ചത്. കുളക്കരയിലെ ഷെഡിൽ ഇരുന്ന സംഘമാണ് രാജേന്ദ്രനെ വെട്ടിപ്പരിക്കേൽപിച്ചത്. അതുവഴി വന്ന നാട്ടുകാർ കൊല്ലങ്കോട്ടെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ശരീരത്തിെൻറ വിവിധ ഭാഗങ്ങളിൽ ആഴത്തിലുള്ള മുറിവുണ്ട്. മൃതദേഹം കൊല്ലങ്കോട്ടെ സ്വകാര്യ ആശുപത്രിയിൽ. വെള്ളിയാഴ്ച തൃശൂർ മെഡിക്കൽ കോളജിൽ പോസ്റ്റ്മോർട്ടത്തിനു ശേഷം ബന്ധുക്കൾക്ക് വിട്ടുനൽകും.ചിറ്റൂർ ഡിവിഷൻ ഡിവൈ.എസ്.പി കെ.സി. സേതു, കൊല്ലങ്കോട് എസ്.എച്ച്.ഒ കെ. സുമിത്ത് കുമാർ എന്നിവർ സംഭവസ്ഥലം സന്ദർശിച്ചു. കൂടുതൽ അന്വേഷണം നടന്നുവരുകയാണെന്ന് അന്വേഷണ ചുമതലയുള്ള എസ്.എച്ച്.ഒ കെ. സുമിത്ത് പറഞ്ഞു. റിസോർട്ടിനു പുറമെ ബംഗളൂരുവിൽ ഇൻറീരിയർ ഡിസൈനിങ് സ്ഥാപനവും നടത്തിവരുകയായിരുന്നു രാജേന്ദ്രൻ. മാതാവ്: സരോജിനി. ഭാര്യ: ഷൈലജ. മക്കൾ: ശ്രേയ (ഫ്രാൻസ്), റിജുള. സഹോദരൻ: ടി.എൻ. രമേശ് (ബി.ജെ.പി നേതാവും പഞ്ചായത്ത് അംഗവും).
