മുളങ്കുന്നത്തുകാവ് (തൃശൂർ): കോവിഡ് ബാധിതരായ ദമ്പതികളെ വീടിനുള്ളിൽ മരിച്ച നിലയിൽ കാണപ്പെട്ടു. മുളങ്കുന്നത്തുകാവ് കോഞ്ചേരി റോഡിൽ താമസിക്കുന്ന പണ്ടാരിപ്പറമ്പിൽ വീട്ടിൽ പരേതനായ രമേഷ് പണ്ടാരിയുടെ മകൻ ഗണേശൻ (57), ഭാര്യ സുമതി (53) എന്നിവരാണ് മരിച്ചത്. വ്യാഴാഴ്ച രാവിലെ 8.45ഒാടെ ഇവർ വീട്ടിലെ കട്ടിലിലും ബാത്ത് റൂമിലുമായി മരിച്ചു കിടക്കുന്നത് മകൾ ഋതുവാണ് കണ്ടത്. സുമതിയുടെ അമ്മ സുശീലയും കോവിഡ് പോസിറ്റിവായി വീട്ടിൽ ചികിത്സയിൽ കഴിയുകയാണ്. സുമതിക്ക് കോവിഡ് അസ്വസ്ഥത ഉണ്ടായിരുന്നെങ്കിലും പരിശോധന നടത്തിയിട്ടില്ല. ഋതു, പ്രസവത്തിനായി തൃശൂർ ഗവ. മെഡിക്കൽ കോളജിൽ പ്രവേശിപ്പിക്കുന്നതിെൻറ ഭാഗമായി പരിശോധന നടത്തിയപ്പോഴാണ് കോവിഡ് വെളിപ്പെട്ടത്. പ്രസവശേഷം ഇവർ വീട്ടിൽ എത്തി ആരോഗ്യപ്രവർത്തകരുടെ നിർദേശാനുസരണം ക്വാറൻറീനിലായിരുന്നു. കോവിഡ് മൂലമാണ് മരണങ്ങൾ സംഭവിച്ചതെന്ന് കരുതുന്നു. ബുധനാഴ്ച ഇവരുടെ വീട്ടിലേക്ക് ആശ വർക്കർ എത്തിയിരുന്നു. ബുദ്ധിമുട്ടില്ലെന്ന് ഇവർ പറഞ്ഞതായി ആശ വർക്കർ പറഞ്ഞു. കുടുംബാംഗങ്ങളെ കില കോവിഡ് സെൻററിലേക്ക് മാറ്റി. ഇരുവരുടേയും മൃതദേഹങ്ങൾ മെഡിക്കൽ കോളജ് മോർച്ചറിയിൽ. പൊലീസ്, ആരോഗ്യ പ്രവർത്തകർ മേൽനടപടി സ്വീകരിച്ചു. വെള്ളിയാഴ്ച പോസ്റ്റ്മോർട്ടം നടത്തും. മക്കൾ: രുദ്ര, റിതു, രഞ്ജിത. മരുമക്കൾ: അശ്വന്ത്, രാഹുൽ, ഹനീഷ്.
