തൃത്താല: പ്രശസ്ത തായമ്പക വിദഗ്ധന്‍ തൃത്താല ചാക്കനത്ത് മാരാത്ത് കേശവദാസ് പൊതുവാള്‍ (58) നിര്യാതനായി. പരേതനായ കുഞ്ഞികൃഷ്ണ പൊതുവാളിെൻറയും പാർവതി പൊതുവാൾസ്യാരുടേയും മകനാണ്. ഹൃദയസംബന്ധമായ രോഗമായിരുന്നു മരണകാരണം. തായമ്പകയില്‍ മലമല്‍ക്കാവ് ശൈലിക്ക് വേണ്ടി ജീവിതം ഉഴിഞ്ഞുവെച്ചവരില്‍ ഒരാളായിരുന്നു ഇദ്ദേഹം. പിതാവ് തൃത്താല കുഞ്ഞികൃഷ്ണ പൊതുവാള്‍ തന്നെയായിരുന്നു ഗുരു. എട്ടാം വയസ്സില്‍ ചെര്‍പ്പുളശ്ശേരി അയ്യപ്പക്ഷേത്രത്തില്‍നിന്ന് അരങ്ങേറ്റം കുറിച്ചു. തൃത്താല ഹൈസ്‌കൂള്‍, പട്ടാമ്പി സംസ്‌കൃത കോളജ് എന്നിവിടങ്ങളില്‍നിന്ന് വിദ്യാഭ്യാസം പൂര്‍ത്തിയാക്കിയ ശേഷം നാലുകൊല്ലം കലാമണ്ഡലത്തില്‍നിന്ന് തായമ്പക പഠിച്ചു. ഇതോടൊപ്പം കഥകളി ചെണ്ടയും മദ്ദളവും അഭ്യസിച്ചു. ഗുരുവായൂര്‍ ക്ഷേത്രം, പട്ടാമ്പി ഗുരുവായൂരപ്പൻ ക്ഷേത്രം, തൃത്താല ശിവക്ഷേത്രം, കൊടിക്കുന്ന് ക്ഷേത്രം, മലമല്‍ക്കാവ് ശ്രീധർമശാസ്ത ക്ഷേത്രം അടക്കം കേരളത്തിലെ ഒട്ടുമിക്ക പ്രധാന ക്ഷേത്രങ്ങളിലും തായമ്പക കൊട്ടിയിട്ടുണ്ട്. ഭാര്യ: നാരായണിക്കുട്ടി. മക്കൾ: അശ്വതി, ആതിര. സഹോദരങ്ങൾ: ജാനകി (തങ്കം), തൃത്താല ശങ്കര കൃഷ്ണൻ. മരുമക്കൾ: ശ്രീനി തൃത്താല, ശ്രീജ.
