പട്ടാമ്പി: പൗരപ്രമുഖനും മുതിർന്ന അഭിഭാഷകനുമായ മണ്ടിലക്കോട്ടിൽ പൊരുതക്കാവിൽ എം.പി. ഉദയവർമൻ തിരുമുൽപാട് (89) നിര്യാതനായി. കോവിഡ് ബാധിച്ച് കോഴിക്കോെട്ട സ്വകാര്യ ആശുപത്രിയിൽ ചികിത്സയിലിരിക്കെ തിങ്കളാഴ്ച അർധരാത്രിയോടെയായിരുന്നു മരണം. ഇടതു സഹയാത്രികനായിരുന്ന ഉദയവർമൻ പട്ടാമ്പിയിൽ മുൻ മുഖ്യമന്ത്രി ഇ.എം.എസിെൻറയും സ്വാതന്ത്ര്യ സമര പോരാളി ഇ.പി. ഗോപാലെൻറയും മുൻ മന്ത്രി കെ.ഇ. ഇസ്മായിലിെൻറയും കൂടെ പ്രവർത്തിച്ചിട്ടുണ്ട്. പട്ടാമ്പിയുടെ സാമൂഹിക, സാംസ്കാരിക മേഖലകളിൽ നിറസാന്നിധ്യമായിരുന്ന അദ്ദേഹം അടുത്തകാലം വരെ പട്ടാമ്പി നേർച്ചാഘോഷ കമ്മിറ്റിയുടെ അമരക്കാരനായിരുന്നു. ഗവ. സംസ്കൃത കോളജ് വെൽഫെയർ കമ്മിറ്റി, ഭാരതപ്പുഴ സംരക്ഷണ സമിതി, പട്ടാമ്പി വികസന സമിതി, സീനിയർ സിറ്റിസൺസ് ഫോറം തുടങ്ങിയ സംഘടനകളുടെ നേതൃപദവികൾ വഹിച്ചിരുന്നു. നവതി ആഘോഷിക്കാൻ ഒരുങ്ങുന്നതിനിടയിലാണ് വിയോഗം. മൃതദേഹം കോവിഡ് പ്രോട്ടോകോൾ പാലിച്ച് കോഴിക്കോട്ട് സംസ്കരിച്ചു. ഭാര്യ: രാധ ഉദയവർമൻ (റിട്ട. കാഷ്യർ, നെടുങ്ങാടി ബാങ്ക്). മക്കൾ: അഡ്വ. ഉണ്ണികൃഷ്ണൻ (തിരുവനന്തപുരം), ധന്യ, ദിവ്യ. മരുമക്കൾ: രഞ്ജന, രമേഷ് കുമാർ, മധു വാസുദേവൻ.
