പത്തിരിപ്പാല: സ്കൂട്ടർ മറിഞ്ഞ് പരിക്കേറ്റ് ചികിത്സയിലിരുന്ന റെയിൽവേ ജീവനക്കാരി മരിച്ചു. മണ്ണൂർ വെസ്റ്റ് ചേറുമ്പാല പെരുങ്കുളങ്ങര വീട്ടിൽ പ്രദീപ് കുമാറിെൻറ ഭാര്യ സുജലയാണ് (45) മരിച്ചത്. തിങ്കളാഴ്ച വൈകീട്ട് അഞ്ചരക്ക് സംസ്ഥാന പാതയിലെ 19ാം മൈലിലായിരുന്നു അപകടം. ഷൊർണൂർ റെയിൽവേ സ്റ്റേഷനിലെ ടെക്നിക്കൽ അസിസ്റ്റൻറാണ് സുജല. ജോലി കഴിഞ്ഞ് സഹപ്രവർത്തകയുടെ സ്കൂട്ടറിൽ വരുമ്പോൾ എതിരെ വന്ന ലോറിയെ കണ്ട് വെട്ടിച്ചപ്പോൾ തെന്നി മറിയുകയായിരുന്നുവെന്ന് പൊലീസ് പറഞ്ഞു. യാക്കര സ്വദേശി സിന്ധുവാണ് സ്കൂട്ടർ ഓടിച്ചത്. പരിക്കേറ്റ ഇരുവരെയും നാട്ടുകാർ ഒറ്റപ്പാലത്തെ ആശുപത്രിയിൽ എത്തിച്ചു. സാരമായി പരിക്കേറ്റ സുജലയെ പിന്നീട് തൃശൂരിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. ചൊവ്വാഴ്ച ഉച്ചക്ക് രണ്ടിനാണ് മരിച്ചത്. മഞളൂർ കെ.കെ ഹൗസിൽ സുദേവൻ-അംബുജാക്ഷി ദമ്പതികളുടെ മകളാണ് സുജല. മക്കൾ: അർഹ, ദുർഗ, സംസ്കാരം ബുധനാഴ്ച.
