മണ്ണാർക്കാട്: കുന്തിപ്പുഴയിൽ ബുധനാഴ്ച കാണാതായ യുവാവിെൻറ മൃതദേഹം കണ്ടെത്തി. ചങ്ങലീരി കൂനിവരമ്പ് ആറുവന്‍പാറ കുളിക്കടവില്‍ ബുധനാഴ്ച കാണാതായ പറമ്പുള്ളി കാരാട്ടുപറമ്പിൽ ഷംസുവിെൻറ മകൻ താഹിറി (36) െൻറ മൃതദേഹമാണ് ഒരു ദിവസം നീണ്ട തെരച്ചിലിനൊടുവിൽ കണ്ടെത്തിയത്. ബുധനാഴ്ച ഉച്ചയോടെയാണ് കുളിക്കാൻ പോയ താഹിറിനെ കാണാതായത്. പുഴക്കടവിൽ വസ്ത്രങ്ങൾ കണ്ട നാട്ടുകാരും അഗ്നിരക്ഷാസേനയും ബുധനാഴ്ച മുഴുവൻ തിരച്ചിൽ നടത്തിയെങ്കിലും കണ്ടെത്താനായിരുന്നില്ല. വ്യാഴാഴ്ച രാവിലെ ഫയർ ഫോഴ്‌സ് സ്‌കൂബ സംഘവും സന്നദ്ധ പ്രവർത്തകരും നാട്ടുകാരും ചേർന്ന് നടത്തിയ തിരച്ചിലിലാണ് ഉച്ചക്ക് ഒന്നോടെ മൃതദേഹം കണ്ടെത്തിയത്ത്. താഹിറിനെ കാണാതായ സ്ഥലത്തിന് കുറച്ചു മാറിയാണ് മൃതദേഹം കണ്ടെത്തിയത്. ജിദ്ദയിൽ ജോലി ചെയ്യുന്ന താഹിർ കഴിഞ്ഞ മാർച്ചിലാണ് അവധിക്ക് നാട്ടിലെത്തിയത്. മാതാവ്: സുലൈഖ. ഭാര്യ: തശ്‌രീഫ. മക്കൾ: സിനാൻ, ഹന.
