ഒറ്റപ്പാലം: സന്ദർശന വിസയിൽ യു.എ.ഇയിൽ എത്തിയ ഒറ്റപ്പാലം സ്വദേശി കോവിഡ് ബാധിച്ച് ചികിത്സയിലിരിക്കെ മരിച്ചു. ചുനങ്ങാട് മലപ്പുറം കൂരാറ്റുതൊടി വീട്ടിൽ പരേതനായ അബ്ദുല്ലയുടെ മകൻ മുഹമ്മദ് റഫീഖാണ് (45) മരിച്ചത്. പനിയും തലവേദനയുമായി മേയ് 22ന് ആശുപത്രിയിൽ എത്തിയ റഫീഖിനെ പരിശോധനയിലാണ് കോവിഡ് സ്ഥിരീകരിച്ചത്. തുടർന്ന് ഗാർഹിക സമ്പർക്ക വിലക്ക് അനുസരിച്ച് മുറിയെടുത്ത് കഴിയുകയായിരുന്നു. ആരോഗ്യ സ്ഥിതി മോശമായതിനെ തുടർന്ന് 27 ന് അജ്മാനിലെ ഖലീഫ ആശുപത്രിയിൽ പ്രവേശിപ്പിച്ചു. ഞായറാഴ്ച ഉച്ചക്ക് രണ്ടോടെയാണ് അന്ത്യം. സൗദിയിലേക്ക് ജനുവരി 15ന് നാട്ടിൽനിന്ന് പോയതാണ്. കോവിഡ് വ്യാപനത്തെ തുടർന്ന് യാത്ര യു.എ.ഇയിൽ അവസാനിപ്പിക്കേണ്ടി വരുകയായിരുന്നെന്നും ഖബറടക്കം അജ്മാനിൽ നടക്കുമെന്നും വീട്ടുകാർ പറഞ്ഞു. മാതാവ്: ജമീല. ഭാര്യ: ജമീല. മക്കൾ: ഷാഹിന നസ്രി, മുഹമ്മദ് സാജിത്. സഹോദരങ്ങൾ: ഹംസ, നൗഫിയ, നസീറ.
