മാത്തൂർ: കുഴൽമന്ദം ബ്ലോക്ക് പഞ്ചായത്ത് അംഗവും മാത്തൂർ -ചുങ്കമന്ദം എ.യു.പി സ്കൂൾ അധ്യാപകനുമായ മാത്തൂർ തണ്ണീരംകാട് ഹരിതം നിവാസിൽ ഇ. ഹരിദാസൻ മാസ്റ്റർ (51) ഹൃദയാഘാതം മൂലം മരിച്ചു. വ്യാഴാഴ്ച രാത്രി 12നാണ് ഹൃദയാഘാതമുണ്ടായത്. ആശുപത്രിയിലെത്തിച്ചെങ്കിലും രക്ഷിക്കാനായില്ല.മാത്തൂർ ചുങ്കമന്ദം ഡിവിഷനിൽനിന്ന് എൽ.ഡി.എഫ് സ്ഥാനാർഥിയായി മത്സരിച്ചാണ് ഹരിദാസൻ ജയിച്ചത്. ജ്വാല സാംസ്കാരിക വേദി ഗ്രന്ഥശാലയുടെ സെക്രട്ടറി, സ്പേസ് ചാരിറ്റബ്ൾ മാനേജിങ് ട്രസ്റ്റി, കെ.എസ്.ടി.എ കുഴൽമന്ദം ഉപജില്ല ജോയൻറ് സെക്രട്ടറി, മാത്തൂർ പ്രതിക്ഷ ചാരിറ്റബ്ൾ ട്രസ്റ്റ് പ്രസിഡൻറ് എന്നീ സ്ഥാനങ്ങൾ വഹിച്ചു വരുകയായിരുന്നു. ‘പൂക്കൾ പറഞ്ഞത്’ പുസ്തകം രചിച്ചിട്ടുണ്ട്. ഭാര്യ: സരിത (അധ്യാപിക, മാത്തൂർ സി.എഫ്.ഡി സ്കൂൾ). മകൾ: ആർദ്ര.
