ഒറ്റപ്പാലം: ചെന്നൈ മെഡിക്കൽ കോളജിലെ റിട്ട. പ്രഫസറും പ്രമേഹ രോഗ ചികിത്സ വിദഗ്ധനുമായ കണ്ണിയംപുറം ചെമ്പൊള്ളി തറവാട്ടിൽ സി.എസ്. മോഹൻദാസ് (89) നിര്യാതനായി. ഒറ്റപ്പാലത്തെ സ്വകാര്യ ആശുപത്രിയിൽ ഞായറാഴ്ച രാവിലെയായിരുന്നു അന്ത്യം. സ്വതന്ത്ര ഇന്ത്യയുടെ ഗവർണർ ജനറലും കേന്ദ്ര മന്ത്രിയും മദ്രാസ് മുഖ്യമന്ത്രിയുമായിരുന്ന സി. രാജഗോപാലാചാരിയുടെ (രാജാജി) അന്ത്യനാളുകളിൽ സ്റ്റാൻലി ആശുപത്രിയിൽ ചികിത്സക്ക് നേതൃത്വം നൽകിയത് ഇദ്ദേഹമായിരുന്നു. പ്രമേഹ സംബന്ധമായ രോഗങ്ങളെക്കുറിച്ചും ചികിത്സയിൽ യോഗയുടെ സ്ഥാനവും വിശദമാക്കുന്ന പ്രബന്ധം 1978ൽ ബംഗളൂരുവിൽ നടന്ന ദേശീയ കോൺഗ്രസിൽ ഇദ്ദേഹം അവതരിപ്പിച്ചത് രാജ്യത്ത് ആദ്യമായിട്ടായിരുന്നു. തുടർന്ന് യൂറോപ്പിൽ നടന്ന മറ്റൊരു അന്താരാഷ്ട്ര സമ്മേളനത്തിൽ സാം മോസസ് എന്ന ഡോക്ടർ ഇതേ പ്രബന്ധം ഉദ്ധരിച്ചിരുന്നു. സ്വാതന്ത്ര്യലബ്ധിക്കുശേഷം തമിഴ്നാട് സർവിസിൽ പ്രവേശിച്ച ഇദ്ദേഹത്തിന്ന് ആദ്യ നിയമനം ലഭിച്ചത് തിരുനെൽവേലിയിലായിരുന്നു. ഭാര്യ: പരേതയായ രാധ. മക്കൾ: ഡോ. പ്രസാദ്, പ്രകാശ് (ആസ്‌ട്രേലിയ).
