ചാലക്കുടി: കാതിക്കുടത്ത് വീട്ടുവളപ്പിൽ പൊട്ടിവീണ വൈദ്യുതി കമ്പിയിൽനിന്ന് ഷോക്കേറ്റ് വീട്ടുജോലിക്കാരി മരിച്ചു. കാതിക്കുടം വാതക്കാടൻ വീട്ടിൽ പരേതനായ ചാത്തെൻറ ഭാര്യ ജാനകിയാണ് (66) മരിച്ചത്. തിങ്കളാഴ്ച രാവിലെ തീരദേശ റോഡിൽ വാക്കാറ്റി മഠം വീട്ടിൽ ഗോതവർമയുടെ വീട്ടുപറമ്പിൽ പൊട്ടിവീണ വൈദ്യുതി കമ്പിയിൽനിന്നാണ് ജാനകിക്ക് ഷോക്കേറ്റത്. ഇവർ ഈ വീട്ടിലെ ജോലിക്കാരിയാണ്. ജാതിത്തോട്ടത്തിന് സമീപം പണിയെടുക്കുന്നതിനിടെ പൊട്ടിവീണ വൈദ്യുതി കമ്പി ഇവരുടെ ശ്രദ്ധയിൽപെട്ടിരുന്നില്ല. വീട്ടുകാർ നിലവിളികേട്ട് ഓടിച്ചെല്ലുമ്പോൾ പിടയുകയായിരുന്നു. ചാലക്കുടിയിലെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മക്കൾ: വിനയൻ, വിജു. മരുമക്കൾ: രേഖ, സുമി. കൊരട്ടി പൊലീസ് സ്ഥലത്തെത്തി മേൽനടപടി സ്വീകരിച്ചു.
