പാവറട്ടി: പ്രമുഖ പരിസ്ഥിതി, സാംസ്കാരിക പ്രവർത്തകൻ പാലുവായി ഗർഷോം കോളനിയിൽ ചക്രമാക്കൽ സി.എഫ്. ജോർജ് മാസ്റ്റർ (85) നിര്യാതനായി. ദേശമംഗലം ഗവ. ഹൈസ്കൂളിലെ റിട്ട. പ്രധാനാധ്യാപകനായിരുന്നു. വാർധക്യ സഹചമായ അസുഖത്താൽ വീട്ടിൽ ചികിത്സയിലായിരുന്നു. സിനിമ, നാടക പ്രവർത്തകനും സാഹിത്യകാരനുമായിരുന്നു. തിങ്കളാഴ്ച രാവിലെ 7.30ന് പാലുവായിലെ വീട്ടിലായിരുന്നു മരണം.
ഗുരുവായൂരിൽനിന്ന് ചക്കംകണ്ടം പുഴയിലേക്ക് മാലിന്യം ഒഴുക്കുന്ന അഴുക്കുചാൽ പദ്ധതിക്കെതിരെ മാസങ്ങളോളം മുൻനിരയിലുണ്ടായിരുന്നു. സമരത്തെ സംസ്ഥാന തലത്തിൽ ശ്രദ്ധ നേടിക്കൊടുത്തത് ഇദ്ദേഹമാണ്.
80കളുടെ തുടക്കം മുതൽ നല്ല സിനിമകളുടെ പിറവികൾക്ക് ചുക്കാൻ പിടിച്ചിരുന്ന അമരക്കാരനായിരുന്നു ഇദ്ദേഹം. സംവിധായകരായ കെ.പി. കുമാരൻ, പവിത്രൻ, പി.ടി. കുഞ്ഞുമുഹമ്മദ്‌, എം. ഗോവിന്ദൻ എന്നിവരുടെ ഉപ്പ്, ആലീസി‍െൻറ അന്വേഷണങ്ങൾ, കബനി നദി ചുവന്നപ്പോൾ, നോക്കുകുത്തി തുടങ്ങീ നിരവധി സിനിമകളുടെ അണിയറയിലും അരങ്ങത്തും നിറസാന്നിധ്യമായിരുന്നു.
സാഹിത്യകാരൻമാരായ എം.പി. നാരായണപിള്ള, ഒ.വി. വിജയൻ, ചിത്രകാരൻ എം.വി. ദേവൻ, ശിൽപികളായ കാനായി കുഞ്ഞിരാമൻ, സി.എൻ. കരുണാകരൻ എന്നിവർ മാസ്റ്ററുടെ വീട്ടിലെ സ്ഥിരം സന്ദർശകരായിരുന്നു.
സംവിധായകൻ പി.ടി. കുഞ്ഞുമുഹമ്മദും നടൻ ശ്രീരാമനും അടുത്ത സുഹൃത്തുക്കളാണ്. ഭാര്യ: പരേതയായ ആലിസ്. മക്കൾ: റീന, ഫിലോ, ഫ്രാനി. മരുമക്കൾ: ഡോ. മാത്യൂസ്‌, പരേതനായ ഷാജി. സംസ്കാരം തിങ്കളാഴ്ച്ച വൈകീട്ട് അഞ്ചിന് പാവറട്ടി സെൻറ് ജോസഫ് ദേവാലയത്തിൽ നടത്തി.
