ഭാഷാ നിഘണ്ടുവിലേക്ക് ഒരു പുതിയ പദം

അയ്യോ...

ഉടലാകെപ്പൊള്ളി

കുടൽമാല കീറി

കുരുതിയാക്കപ്പെട്ട

ഒരു കുഞ്ഞിന്റെ

ദീന ഞെരക്കത്തെ

ഏതു ക്രിയാനാമത്താലാണ്

വിവക്ഷിക്കുവാനാകുക?

റബ്ബേ,

ആ കൊഴുത്ത ചെന്നായയുടെ

പുഴുത്ത കടവായിലൂടെ

തുടം തുടം

ചാലിട്ടൊഴുകിയ

ചോരയ്ക്ക്

ദ്രവ്യ, സംജ്ഞാ,

സാമാന്യ നാമങ്ങളിൽ

ഏതു പദമാണ്

ഞാൻ തിരഞ്ഞു

കണ്ടെത്തുക?

അർ റഹീം,

കല്ലുളികൾപോൽ

കൂർത്ത തേറ്റയാൽ

കടിച്ച്

കുടഞ്ഞെറിയപ്പെട്ട

കുന്നിമണിപോലുള്ള

ആ കുഞ്ഞുഹൃദയം

കല്ലുകൾ കാച്ചി

മുള്ളുതറച്ച്

മണ്ണുപുതഞ്ഞ്

പിടച്ച്

തുടിപ്പണഞ്ഞത്,

നരഹത്യയെന്ന

കേവലക്രിയയിൽ

ചുരുക്കുവാനാകുമോ?

പടച്ചവനേ,

മുലകടഞ്ഞ്

മുലക്കണ്ണറുത്ത്

അടിവയർ വീർത്ത്

ഗർഭപാത്രം തള്ളി,

ആഞ്ഞൊരൂർധത്താൽ

പിന്നിലേക്ക് പിടഞ്ഞുവീണ

സന്നിപാതമൂർച്ഛയെ

മാതൃദുഃഖമെന്ന്

ഏതു

കീശാനിഘണ്ടുവിലാണ്

അച്ചുനിരത്തിയിട്ടുള്ളത്!

അല്ലാഹ്,

ആ നേർസാക്ഷ്യത്തിന്റെ

നടുക്കത്താൽ,

നിരന്തര സ്ഫോടനങ്ങളുടെ

മുഴക്കത്താൽ

ചുറ്റിലും ഗന്ധകം നാറുന്ന

ഈ നാശംപിടിച്ച

നശിച്ച നട്ടുച്ചക്ക്,

രേതസ്സൊടുങ്ങിയ

ഈ മാനംകെട്ട

എഴുത്തുപേനയുടെ

ഷണ്ഡതയെ

ഭാവനാശൂന്യതയെന്ന്

നിരാമയം നിശ്വസിച്ച്

മയക്കം നടിക്കാനാകുമോ?

പെരിയോനെ,

ഈ ഗതികെട്ട കാലത്തിന്റെ

ദ്രവിച്ച പദങ്ങളുടെ

ആ മുടിഞ്ഞ പദാവലിയിൽ,

അന്ധനായ്

ബധിരനായ്

മൂകനായ്

ജനിച്ചുപോയതിന്റെ

നിരാശയാലും

ജുഗുപ്സ‌യാലും

ഭയത്താലും

അകംപൊള്ളുന്ന

ആത്മനിന്ദയാലും

പനിച്ചു വിറച്ചു

മരച്ചുപോയ

വിരലുകളാൽ

പകരമൊരു പദം

കുറിച്ചുചേർത്ത്,

അനാവൃതമായ

സ്വന്തം നഗ്നതയിൽ

ഈ തുലഞ്ഞ തൂലിക ഞാൻ

കുത്തിയൊടിക്കട്ടെ..!

ഗസ്സാ...

-------------

(*കെ.ഇ.എന്നിനെ കേട്ടതിൽനിന്ന്!)