ചെമ്മാട്: പ്രശസ്ത നേത്രരോഗ വിദഗ്ധനും ഖുർആൻ ശാസ്ത്ര പണ്ഡിതനുമായിരുന്ന ഡോ. പി. അബൂബക്കർ (85) നിര്യാതനായി. പന്തക്കലകത്ത് മൂസയുടെയും കാഞ്ഞിരാല ഫാത്തിമയുടെയും മകനായി 1940 ജൂൺ അഞ്ചിന് അരീക്കോട് താഴത്തങ്ങാടിയിലാണ് ജനനം.
അരീക്കോട് ബോർഡ് എലമെന്ററി സ്കൂൾ, മഞ്ചേരി ഗവ. ബോയ്സ് ഹൈസ്‌കൂൾ എന്നിവിടങ്ങളിൽ പ്രാഥമിക പഠനം പൂർത്തിയാക്കിയ അദ്ദേഹം ഫാറൂഖ് കോളജിലാണ് പ്രീയൂനിവേഴ്സിറ്റി പൂർത്തിയാക്കിയത്. ആലുവ യു.സി കോളജിൽ പ്രീമെഡിസിൻ കോഴ്സ് കഴിഞ്ഞ് കോഴിക്കോട് മെഡിക്കൽ കോളജിൽ നിന്നാണ് മെഡിക്കൽ ബിരുദം കരസ്ഥമാക്കിയത്.
1966 ഫെബ്രുവരി 18ന് പരപ്പനങ്ങാടി നെടുവ പ്രാഥമികാരോഗ്യ കേന്ദ്രത്തിൽ ഔദ്യോഗിക ജീവിതം ആരംഭിച്ച അദ്ദേഹം വേങ്ങര, കോഴിച്ചെന എന്നിവിടങ്ങളിലെ പ്രാഥമികാരോഗ്യ കേന്ദ്രങ്ങളിലും സേവനമനുഷ്ഠിച്ചു. 1976 മുതൽ തിരൂരങ്ങാടി ഗവ. ആശുപത്രിയിലും തിരൂർ താലൂക്ക് ആശുപത്രിയിലും ദീർഘകാലം പ്രവർത്തിച്ചു. 1990ൽ ഔദ്യോഗിക സേവനം അവസാനിപ്പിച്ചെങ്കിലും അന്ത്യംവരെ നാട്ടുകാരുടെ പ്രിയപ്പെട്ട ഡോക്ടറായി ആതുര സേവനരംഗത്ത് തുടർന്നു.
എം.കെ. ഹാജിയുമായി വ്യക്തിബന്ധം പുലർത്തിയിരുന്ന അദ്ദേഹം തിരൂരങ്ങാടി യതീംഖാനയിലെ അനാഥമക്കളുടെ ഡോക്ടർ കൂടിയായിരുന്നു. 1996ൽ എം.കെ. ഹാജി ഹോസ്പിറ്റൽ ആരംഭിച്ചപ്പോൾ അദ്ദേഹമായിരുന്നു പ്രഥമ മെഡിക്കൽ ഓഫിസർ.
പരപ്പനങ്ങാടിയിലെ മത്സ്യത്തൊഴിലാളികൾക്ക് ആശ്വാസം നൽകി വീടുവീടാന്തരം കയറിയിറങ്ങി മെഡിക്കൽ സേവനം നടത്തിയിരുന്ന അദ്ദേഹം മുൻ ഉപമുഖ്യമന്ത്രി കെ. അവുക്കാദർകുട്ടി നഹയുമായും അടുത്ത ബന്ധം സൂക്ഷിച്ചു. മുൻ സ്പീക്കറും വിദ്യാഭ്യാസമന്ത്രിയുമായിരുന്ന ചാക്കീരി അഹമ്മദ്‌കുട്ടിയുടെ പിന്തുണയോടെ വേങ്ങരയിലും സേവനപ്രവർത്തനങ്ങൾ നടത്തി.
വിശുദ്ധ ഖുർആനിലെ ശാസ്ത്രവിഷയങ്ങളിൽ ഗവേഷണം നടത്തിയിരുന്ന അദ്ദേഹം മുഹമ്മദ് അമാനി മൗലവിയുടെ ഖുർആൻ വ്യാഖ്യാന ഗ്രന്ഥം പുറത്തിറക്കിയ പ്രഥമ കമ്മിറ്റിയിലെ അംഗം കൂടിയായിരുന്നു. സ്വന്തമായ ഗവേഷണത്തിലൂടെ വിശുദ്ധ ഖുർആനിന്റെ ഏഴ് വാള്യങ്ങളടങ്ങുന്ന ഇൻഡക്സ് ഗ്രന്ഥം അദ്ദേഹം തയാറാക്കിയിട്ടുണ്ട്.
ദീർഘകാലം കെ.എൻ.എം മലപ്പുറം വെസ്റ്റ് ജില്ല പ്രസിഡന്റായിരുന്ന അദ്ദേഹം ചെമ്മാട് പള്ളിപ്പടി കരുണ കാൻസർ ഹോസ്പിറ്റലിന്റെ ചെയർമാനും ആയിരുന്നു. വേങ്ങര മനാറുൽ ഹുദാ മസ്‌ജിദ്‌, ചെമ്മാട് സലഫി മസ്‌ജിദ്‌ എന്നിവ സ്ഥാപിക്കുന്നതിൽ മുഖ്യപങ്ക് വഹിച്ചു. യു.എസ്, യു.കെ, ജപ്പാൻ, സൗദി, യു.എ.ഇ എന്നീ രാജ്യങ്ങൾ സന്ദർശിച്ചിട്ടുള്ള അദ്ദേഹം ഇന്തോ-ജപ്പാൻ ഒഫ്താൽമോളജി അംഗമായിരിക്കെ ജപ്പാനിലും സേവനമനുഷ്ഠിച്ചിട്ടുണ്ട്. 1999 മുതൽ 2005വരെ അൽഐനിലും പ്രവർത്തിച്ചു.
ഫാറൂഖ് കോളജ് മുൻ പ്രിൻസിപ്പൽ പ്രഫ. എൻ.വി. ബീരാന്റെ മകളും തിരൂരങ്ങാടി പി.എസ്.എം.ഒ കോളജ് പ്രഫസറുമായിരുന്ന പരേതയായ എൻ.വി. സുലൈഖ, കൊടിയത്തൂർ കോട്ടുമ്മൽ റംല എന്നിവർ ഭാര്യമാരാണ്.
മക്കൾ: ഡോ. സമീൽ, എൻജിനീയർമാരായ നസീൽ, സലീൽ, റസീൽ (എല്ലാവരും യു.കെ), ഷംല, ഡോ. സഹ്‍ല, ഡോ. നിഹ്‌ല. മരുമക്കൾ: ഡോ. നിഷ അലി, ഹുസ്‌ന, ഫാത്തിമ, ഡോ. മറിയം (എല്ലാവരും യു.കെ), മഹ്ബൂബ് (അബൂദബി).
ഇ.ടി. മുഹമ്മദ് ബഷീർ എം.പി, പി.കെ. അബ്ദുറബ്ബ്, പി.കെ. അബ്ദുൽ മജീദ് മദനി, സി.പി. ഉമർ സുല്ലമി, കുഞ്ഞിമുഹമ്മദ് മദനി പറപ്പൂർ, സി.എച്ച്. മഹമൂദ് ഹാജി, കെ.പി. മുഹമ്മദ് കുട്ടി തുടങ്ങിയവർ ജനാസ സന്ദർശിച്ചു. ഖബറടക്കം ഞായറാഴ്ച രാവിലെ ഒമ്പതിന് അരീക്കോട് താഴത്തങ്ങാടി ജുമാമസ്ജിദ് ഖബർസ്ഥാനിൽ.
